सुचनाडबली सहकर्मी/ माघ २० बुटबल,सिद्धार्थ गौतमबुद्ध क्याम्पसमा स्नातक तहका नव आनगन्तुक बिद्यार्थीलाई नेपाल बिद्यार्थी संघले स्वागत गरेको छ ।
क्याम्पसमा कार्यक्रमको आयोजना गरि नेपाल बिद्यार्थी संघ इकाई समितिले नव आगन्तुक बिद्यार्थीलाई स्वागत गरेको हो ।
बिद्यार्थी स्वागत कार्यक्रममा बोल्दै नेपाली काँग्रेस रुपन्देहीका सभापति तथा पूर्व मन्त्री अब्दुल रज्जाकले नेपालको प्रजातान्त्रिक आन्दोलन र राजनीतिक परिवर्तनमा बिद्यार्थीको महत्वपूर्ण भूमिका रहेको बताउनु भयो।
उहाँले अहिले बहुमतको कम्युनिष्ट सरकारले नेपाली जनतालाई धोका दिएकाले त्यसका बिरुद्ध पनि बिद्यार्थीले सरकारलाई सचेत गराउन आवश्यक रहेको औंल्याउनु भयो । सभापति रज्जाकले सरकारले संविधान प्रतिकुल हुनेगरी बिधेयकहरु ल्याउने तथा संविधानको मर्म र भावना विपरित लोकतन्त्रलाई कमजोर बनाउने काम गरेकाले नेपाली काँग्रेसले गरेका बिरोधका कार्यक्रममा साथ र सहयोग गर्नकालागि पनि नेबिसंघलाई आग्रह गर्नुभयो ।
कार्यक्रममा बोल्दै नेपाली काँग्रेस रुपन्देहीका सचिव रामकृष्ण खाँणले कम्युनिष्ट सरकारले सत्तालाई माग्ने भाँडो बनाएको बताउँदै नेपाल गरिव भए पनि देशको स्वाभिमानमा मानमर्दन नगर्न सरकारलाई आग्रह गर्नुभयो । उहाँले स्ववीयु निर्वाचन नजिकिँदै गर्दा आफूले हार्ने भयले स्ववीयु निर्वाचन हुन नदिनकालागि सत्तासिन दलका भातृसंगठनहरुले गतिबिधि सुरु गरेकाले त्यसतर्फपनि सचेत हुन नेबिसंघका नेताहरुलाई आग्रह गर्नुभयो । त्यस्तै बुटवल नगर समितिका सभापति खेलराज पाण्डेले सिद्धार्थ क्याम्पसको जग्गा प्राप्ती र भवन निर्माणकालागि नेपाली काँग्रेसको भूमिका रहेको स्मरण गर्दै आगामी दिनमा पनि क्याम्पसको स्तर बृद्धिमा पार्टीले सक्दो सहयोग गर्ने प्रतिवद्धता व्यक्त गर्नुभयो ।
नेपाल बिद्यार्थी संघ इकाई समितिका सभापति महेश शर्मा पौडेलले स्ववीयु निर्वाचन नजिकिँदै गर्दा विपक्षि संगठनले क्याम्पसका प्राध्यापकहरुलाई आक्षेप लगाउने तथा बिद्यार्थीमा समेत भ्रम फैलाउने गतिबिधि गरेकाले त्यस्तो नगर्न चेतावनी दिनुभयो । कार्यक्रममा क्याम्पस प्रमुख बिष्णुप्रसाद राना, इकाई सचिव दिपक घिमिरे , अस्मिता भारती लगायतले शुभकामना व्यक्त गर्नुभएको थियो । त्यस अवसरमा क्याम्पसमा अध्ययनरत बिद्यार्थीहरुले सांस्कृतिक कार्यक्रम र आफ्नो कला प्रस्तुत गर्नुका साथै राष्ट्रिय कलाकारहरु बिक्रमबाबु विश्वकर्मा, बिनोद बिष्ट र सुमन कार्की लगायतले विद्यार्थीलाई झुमाएका थिए ।
