१८ फागुन २०७६ प्यूठान : टेलिभिजनको लाइभ दोहोरी कार्यक्रमबाट उदाएकी धादिङकी कमला घिमिरे बिजुवारमा जारी स्वर्गद्वारी चौथो प्यूठान महोत्सवमा आइपुगिन्। कमला आउने खबरले प्यूठानका गाउँगाउँबाट दर्शक महोत्सवमा ओइरिए। बिहीबार आधा दर्जन कलाकारको प्रस्तुति भए पनि धेरैजसो दर्शक उनै कमलाको प्रतिभा सुन्न आतुर देखिन्थे। फागुन ८ देखि जारी महोत्सवमा सबैभन्दा धेरै दर्शक कमला आउने दिन नै ओइरिए।
‘चिया छानेको, बोलीले हँसाउन कत्ति जानेको’ उनले गाएको गीत सबैजसो दर्शकको मनमा बसेको छ। महोत्सव स्थलमा भेटिने सबैले कमलाले गाएको ‘चिया छानेको’ सुन्न आएको भन्ने भेटिन्थे। यति सानै उमेरमा हजारौं दर्शकका अगाडि नाम चलेका कलाकारसँग लाइभ दोहोरी गाउन सक्ने ‘विलक्षण’ क्षमताकी कमला प्यूठानीको मनमा बसिन्। स्टेजमा प्रस्तुति राख्दा उनलाई कैद नगर्ने कमै हुन्थे।
