फागुन २३,पोखरा विभिन्न विद्यालयमा अध्ययनरत किशोरीहरुलाई आत्मरक्षा तालिम दिइएको छ। एसओएस हर्मन माइनर स्कुल गण्डकी, एसओएस पोखरा, लिला आधारभुत विद्यालय र कालिका माध्यमिक विद्यालयका किशोरीहरुलाई तालिम दिइएको हो।युवा अवस्थामा रहेका शारिरीक र यौन हिंसाको उच्च जोखिमलाई ख्याल गर्दै तालिम आयोजना गरिएको एसओएस युथ केयरकी सिनियर काउन्सिलर प्रमिला भट्टराईले बताइन्।
पछिल्लो समय महिला हिंसाको दर बढ्दै गएपछि त्यसको विरुद्धमा महिलाहरुलाई नै सक्षम बनाउन लागिएको उनले सुनाए।‘हिंसा विरुद्ध लड्ने भनेर त भनियो। तर कसरी? त्यो पनि सिकाउनुपर्यो नि,’ जोन्टा क्लवकी अध्यक्ष मिरा ज्योति कंसाकरले भनिन्, ‘उनीहरुलाई शारिरीक र मानसिकरुपमा नै फिट बनाउनुपर्छ। अहिले नै लड्न जाने भनेको होइन। पहिला आफूमाथि हिंसा भएको छ भन्ने कुरा किशोरी र बालिकाहरुले बुझ्नुपर्छ। त्यसपछि त्यसविरुद्ध आवाज उठाउन सक्ने बनाउन लागेका हौं।’ हिंसा हुँदै गर्दा त्यहाँबाट फुत्किनका लागि सीप सिकाउन लागेको उनको भनाई छ।
