काठमाण्डौं, साउन २९ । लामो समयपछि मैदान फर्किएको महिला टी–२० क्रिकेटमा जर्मनीले शानदार सूरुवात गरेको छ ।
सिबर्न क्रिकेट सेन्टरमा सम्पन्न पहिलो खेलमा अष्ट्रियालाइ ८२ रनले पराजित गर्दै जर्मनीले शानदार सुरुवात गरेको छ ।
टस हारेर ब्याटिङको निम्तो पाएको जर्मनीले पूरा २० ओभर खेल्दै २ विकेट गुमाउदै १६५ रन बनायो । जर्मनीका लागि क्रिस्टिना गौफले ७२ रनको अर्धशतकीय पारी खेलिन् । उनले ६२ बलमा ९ चौकासहित ७२ रन बनाइन् भने कप्तान अनुराधा डोड्डाबल्लापुरले अविजित रहँदै ३० बलमा ४० रनको योगदान दिइन्। साथै जर्मनीलाई २१ रन अतिरिक्त प्राप्त भयो ।
१६६ रनको लक्ष्य पछ्याएको अष्ट्रियाले १९ ओभरमै सबै विकेट गुमाएर ८३ रन मात्र जोड्न सक्यो । अष्ट्रियाका रेजर्ता अभ्दिलाजल र स्ल्याविया कैलाठले समान १–१ विकेट लिए। जवाफी ब्याटिङमा अष्ट्रियाली कप्तान अन्द्रिया–माय जपेडाले ३५ रन बनाइन् भने अन्य खेलाडीले सम्झनलायक प्रदर्शन गरेनन्। खेलमा अष्ट्रियालाई २७ रन अतिरिक्त प्राप्त भएको थियो ।
यता जर्मनकी इमा बाग्र्ना र अस्मिता कोहलीले समान ३–३ विकेट टिए भने मिलेन बेरेस्फर्डले २ विकेट लिइन्। बुधबारबाट सुरु भएको पाँच टी–२० खेलको को सिरिज आगामी अगस्ट १५ सम्म चल्नेछ ।
