राम प्रघट कोरी चैत्र २९ –विजयनगर कपिलवस्तुको इन्द्रेणी सामुदायिक बन उपभोक्ता समिति लोहरौलाले शनिवार विजयनगर गाउँपालिकालाई खाद्यान्न हस्तान्तरण गरेको छ । बन उपभोक्ता समितिले १० क्युन्टल चामल, १ क्युन्टल दाल, १ क्युन्टल आलु, १० लिटर तेल, र ५० किलो नुन लगायत सामग्रीहरु गाउँपालिकाका अध्यक्ष गोपाल बहादुर थापालाई हस्तान्तरण गरिएको बन उपभोक्ता समितिका अध्यक्ष बनवारीलाल चौधरीले जानकारी दिनुभएको छ ।
गाउँपालिकाको विपद् व्यवस्थापन कोषमा राहत स्वरुप खाद्यान्न प्रदान गरेको अध्यक्ष चौधरीले बताउनुभयो । यस विषम परिस्थितिमा इन्द्रेणी सामुदायिक उपभोक्ता समितिले अत्यावश्यक खाद्यान्न उपलब्ध गराई सराहनीय कार्य गरेकोमा गाउँपालिका अध्यक्ष गोपाल बहादर थापाले धन्यावाद दिनु भएको थियो ।
अहिले विश्वभरी महामारीको रुपमा फैलिएको कोरोना भाइरस (कोभिड–१९)को संक्रमणलाई नियन्त्रण तथा रोकथाम गर्न सरकारले लगाएको लकडाउनको चपेटामा परेका गरिब, विपन्न र गरी खाने मजदूर वर्गका लागि राहत स्वरुप उक्त खाद्यान्न हस्तान्तरण गरिएको उपभोक्ता समिति लोहरौलाले जनाएको छ ।
इन्द्रेणी सामुदायिक बन उपभोक्ता समितिका अध्यक्ष बनवारीलाल चौधरी, उपाध्यक्ष पल्टीराम चौधरी र सचिव शिवपूजन चौधरी लगायतको उपस्थितिमा आद्यान्न हस्तान्तरण गरिएको थियो ।
